قصيدة الأعتزاز بالنفس وذكر الحقائق على صوت زخّات المطر ومع ا

قصيدة الأعتزاز بالنفس وذكر الحقائق
على صوت زخّات المطر ومع الفرحة بهطولة في مدينة الرياض تحركت القريحة وصاغت هذه الملحمة أعتزازاً بالنفس حيث أن الأنسان لا يملك أثمن ولا أغلى من العزة والكرامة وهذه العزة والكرامة يعتز من صانها ويندم من خانها وهذه القصيدة تدور حول أوضاع تزوير نسب عنزة وما أثير من أشاعات قد ثبت بطلانها وثبت الحق وزهق الباطل فقلت :
مـبـداي فـي منشي عـبـاده وخالـقهـا *** رب الخـلايـق ولـي الـكـون كـونـهـا
من مـد جـوده جميع الخلـق رازقـهـا *** أرزاق خلقـه عظيـم الشان ضامنهـا
وبعد ذكر الـلـه نظمت أشعار ناطقها *** مـن فـن بدعي عن التحوير وازنهـا
أرتـبّ بـيـوت الـقـوافـي وأنـسـقـهّــا *** مـن خاطـري صغتها والفكـر لحنّهـا
أمـيّـز أهـدافـهـا وأفـهـم طـوارقـهــا *** أخـتـار مظمونهـا وبالطـرس أدونهـا
ماني من الـلي صناف الهـرج نمقّها *** ولا قـلت أمجـد كرام القوم أبي منهـا
مـن عـز نفسه عن الدنعات يفهـقهـا *** عـن كـل غايـة تجيب العـيب صاينها
لـي نـفس حـرٍ دروب العـز تعـشقهـا *** ومـن حـقي أرفع هامتي ليه أطمنّها
وأهـل التـملـّق مـا نـفعـهـا تـمـلقّـهـا *** الـلي بـهـرج الخـطـأ تلـفـظ ملاسنها
مـن يـفـتهـم جـل الأمـور ودقـايـقهـا *** مـا يجهـلـه ضاهـر القـصة وباطنهـا
أبي أتعب النفس بالتكليف وارهـقهـا *** أجهـدت والعـزوة جهـودي تـثمنهــا
مـافـات وقـتي مـع الشـلات بالمـقهـا *** أجلس مـع رجـال عارفهـا وباخنهـا
أهـل الفضيله تـشّرف مـن يـرافـقهـا *** وأهـل الـرذيـلـه تـنـّدم مـن يخـادنهـا
مقـاصد المخلص المـوثـوق حقـقّهـا *** وكل الصعوبات رب العرش هـوّنهـا
مسيـرة المقـتـدي مـا أحـدٍ يـعـوقـهـا *** يجتـاز وأهـل الحسد تكثـر غـبـاينها
أهـل الجحود الـولي مـولاي يمحقهـا *** تبحث عـن الشين والزينات تـدفنهـا
وأهل الحسد حسدها بالنـار يحرقهـا *** مـاني رهيـن أمـرهـا ولاني مداهنها
الفـاظ شعـري مـديح الـربـع شوقهـا *** أذكـر فخـر عـزوتي وأذود بـه عنها
وأكافـح الـلي بهـرج القـدح يـدرقهـا *** عـلى وضـوح النـقـا مـاني مهادنهـا
أسـجـل أنـسـاب الـقبـيـلـة وأوثـقـهـا *** أفخـر بهـا وأعتزي وأذكر محاسنها
سجلـت تـاريخهـا وماضي سوابـقهـا *** ولاكـل من خـاض بالأنساب يتقـنهـا
الـلي جدود العـرب لـه شف يسرقهـا *** مـا تـنـتحـل مبـطي التـاريـخ بـيّـنهـا
مـن زوّر الـواقـع أوراقـه يـمـزقـهـا *** يا ليت لـو ينصح وعـن منهجه ينهـا
من خـط حـرف الغـلط وأرياه لفـقهّـا *** لـه الـفـت أنـظـار القبـيلـة وأفـطّنهـا
والمشهد الـلي بـجـد الغـيـر يلصقهـا *** يـحـز بـنفـوس الحمـايـل ويـحـزنهـا
والـلي يصدون كن أسماعهم صقهـا *** عـن الحقـايـق ولـو صحت قـراينهـا
كان السفينه غشاها الموج واغرقها *** مـن يرغب اسعافها صعب ايتماكنها
أذكـر فخـر عـزوتي وأذكـر معامقهـا *** حـمايـلٍ طيبـهـا مـن طـيـب معـدنهـا
وثـايـق أنسابـهـا تـعـرف حـقـايـقهـا *** كـل المصـادر عـلى الأشهـاد تعلنهـا
عـنـاز فـي قـبـلي الـديـرة ومشرقهـا *** مـعـروفـه بـجـدهـا لا فـي مساكنـهـا
أولاد وايـل لـو تـبـاعــد مـنـاطـقـهــا *** أنسابها تـعـرف ومعـروف موطنهـا
نـعـم الرجـال الـلي تشيـل بعـواتقهـا *** الـلي الصبر طبعهـا والطيـب ديدنهـا
تشهد لهـا سيوفهـا وتشهـد بنـادقهـا *** يوم الفوارس عزيـز الروح ترهنهـا
ريـح الفـتـايـل تـفـوح بأنـف ناشقهـا *** والكل لأخصامـه الحشوات يسحنهـا
شجعـان يـوم الـوغى تلـفح بيـارقهـا *** والكـل قصـده صدور القـوم يطعنهـا
عصر المغـازي ترد حقـوق واسقهـا *** وفي كـل ديـرة ربـيع وريـف تقطنها
كم روح زابن عن أخذ الثـار تعتقهـا *** الجـالـي الخـايـف المظيـوم يـزبـنهـا
مـا خانـت أصحابها والـلي يصادقهـا *** تـعـتـز صـدقـانـهـا واتـذل خـايـنهــا
من طبع الأجـواد ما تـنفى لـواحقهـا *** السلم والعـرف لهـم حـقـوق قـنـنهـا
والـلي القبيلـة هـدف قصده يفـرقهّـا *** يـفـرح بتشتيتهـا ويـكـره تـظـامنـهـا
بـيـت القبـيلـة خـلـولـه مـا يـفـتـقّـهـا *** ألا نـحـيـس تـجّـزع مـن تـعـاونـهــا
والـلي الإشاعات بين الناس يطلقهـا *** يـقـدح وهـو غايتـه بالصدر خازنهـا
لـو بـث أشاعه ما وجـد من يصدقها *** غـلطـان مـن بـثـهـا والـلي تـكهـنهـا
دعـايـتـة وسـط المجالـس يسـوقـهّـا *** يـقـدح ونـفس الغـبي بالغـل يشحنها
فـتـاّح بـوب القشـر ملـزوم يغـلـقهـا *** وأهـل النمايـم رسـول الـلـه يـلعـنّهـا
هـرج النقـيلي سعيـر الشـر يـعـلقهـا *** يكـيـد بـيـن البشـر والنـاس يفـتـنهـا
مبطي هـل البـوق مـا تؤمن بوايقهـا *** مثـل الأفـاعي لـدوغ وكيـف نـأمنهـا
سـم الأفـاعـي تـمـزق كـبـد ذايـقـهــا *** اجسـامـهـا سـامـه مـهـمـا تـلايـنـهـا
أبي أكتب الملحمة بالطرس وأرفقها *** تـهـدى لبعيـد النظـر لأجـل ايتمعنهـا
وأختمها باللي دعات الشرك طوقها *** المصطفى صـان الشريعـة وحصّنهـا

الشاعر عبدالله بن عبار

صح لسان الشاعر
اشكرك اختي الوايليه على هذا الطرح المميز تقبلي مروري وخالص احترامي

» قصيدة بن فطيس
» قصيدة مشعل الحارثي
» هذه قصيدة أعجبتني وأحزنتني في نفس الوقت لأنها جات في ؟؟
» قصيدة محمد الدسم (( أم الوصايا )) أو ((الشيخة))......
» قصيدة الشيخ علي القبل نمران